سفريات ناصيف وعنتر

نصيف وعنتر خلقوا ب ٣١ تموز، يعني من برج الاسد. شي ملائم جدا إذا بتسألوني، حيث إنن بسس يعني. أمهن اسما ناني، وهيي بسينة الوانها كوكتيل، جسمها كتير صغير، والاهم من هيك انو اذنيها مطعوجين.

كيف تإجت بسينة متل ناني ع بعلبك؟ سؤال بيطرح نفسوا حيث انو الاجر الاجنبية خافة من ايام الكورونا ومن وقت سكر شاورما وفلافل شرف الدين الي ع طريق راس العين قبل زاوية طلعة السراي. كنت تأكل الشاورما مع ريحة اكياس زبالة عطتك عمرها مدفونة بالنهر وبرغش فرنساوي ما عم يفهم عربي ويحل عن سمانا.

المهم، كمان يعني القواص وحروب العشائر كان الها يد بس شي لا يذكر بتخفيف الاجر الاجنبية، السبب الرئيسي يبقى الشاورما.

بالعودة الى ناني وفي أحد ليالي البرد القارص في بعلبك، ايام اسا كان في مازوت وما كنت ابكي انا وعتلانة هم ازا حيتدفو اهلي عل صوبة هل سنة، بيحكيني الوالد بقلي لقا بسينة عل برندة تحت الثلج، كلها شحبار ومقصوصين ادنيها ومريضة ومش عرفان شو يعمل فيها.

طبعاً انا بما إني PETA العيلة، هرعت لافهم شو الوضع واعمل تحقيق بمصرد هذه القطة المعذبة. وبعد التحقيق ومعاينة صور الواتس اب المغبشة من ايفون ٦ تبع البابا، تبين معي التالي: اولا، ناني الي ما كان اسمها ناني وقتها، اذنيها مش مقصوصين، هي نوعها هيك، متل ال Scottish fold, للقراء الاجانب. بس هي مانها سكوتش فولد، هي عادي كوكتيل. والي بوصلنا الاستنتاج الثاني: ناني (ما كان اسمها ناني والله نسيت شو كان اسمها بس مش ناني)، ما كانت مشحبرة لا، ولا عليها شحتار من صوب الجيران والقساطل، بل هي لونها هيك ممشح مزغلل مفروم نص أشقر نص اسود نص اورونجي (هيك صاروا تلت نصاص يعني ١٥٠٪ بسة؟؟ غريب)، مش مشكلة المهم ناني كانت مش وسخة الي بوصلنا الاستنتاج الثالث، او بالأحرى سؤال، هي ليش هيك ضعيفة؟

ناني والوالد أصبحوا اصدقاء، وصار بابا يتحجج فيها عشان ما ينزل ع بيروت، انو مين بدو يهتم فيها، هو الفكرة انو ما بحب بيروت عشان ريحتها متل الفص بس معلش. هو هيك طول عمرو كان يقلي انو ترك الدني عشان هوا بعلبك، وانا ما حسيت بهل شي ولا كنت افهم لحد ما فليت، وبعدني مش كتير معلقة ببعلبك قدو، بس لما صار عندي بيت وتاريخ ببيروت، بلشت اتعلق بهوا بيروت، وهون صرت افهموا شوي، مع انو بعلبك ريحتها سقعه وحشيش وصوبة (سابقا)، وبيروت ريحتها فعلا ضراط، ولكنني تعلقت فيها. يمكن عم اكذب عحالي عشان ما فيني فل من البلد، اللاوعي أخو منيوك بطبيعتو، بس بغض النظر عن السبب تعلقت ببيروت والبنايات والشوارع…

المهم ناني طلعت صغيرة جدا، وبعدها مش مدربة، فا علمها الوالد كيف تكون القطط (ابو الله يرحموا يوسف عقيل كان طبيب بيطري وموظف حكومي، هاي عم احكيكن بالستينات ايام الي كان الموظف شي ديلوكس وعايش باللوج). مرق الشتاء وناني طلعت مش مريضة بل ممحونة وعضمها بدو دعك. كيف عرفنا؟ لما الست ناني حبلت اول مرة وما عرفت كيف تفضي الصغار ف ماتوا اختناقا بالخرى (صورة رمزية عن تعلقي ببيروت). اتنبه الوالد بس ات واز تو لايت، وماتوا الصغار. راحت ناني الممحونة حبلت مرة أخرى وجابت ٣ بيبي، قطنة (البيضاء، طبعا انحجزت دغري من دكتور السنان، هل بسبب العنصرية الجماعية اللاواعية الي بتربط الابيض بالعلو؟ لن نعرف بس ساڤا)، وشقرون (المعروف ب عنتر لأني قررت هيك)، وسوداني (متل فول سوداني) سوداني كان مفكرينو بنت، مش مهم الجندر، المهم انو ابي ما الو خلاق يجيب بعد بس صغار، فا قبل انو أحد سوداني، ويضل عنتر معو. طلع سوداني صبي بزيارة اخرى، قام طمع الوالد به وقلي خدي عنتر. ليش بقا لأنوا سوداني (المعروف حاليا بناصيف زيتون) أذنيه معوجين متل امو ولوني اسود سادة، يعني بسين مميز.

منصل ل اليوم، انا بالفان رايحة عبيروت بعد عطلت نهاية الأسبوع طويلة بسبب عيد الاستقلال (ههه هه) ومعي ناصيف وعنتورة وانا سعيدة جدا! ناصيف طلع أطرش وعنتر احول، يعني التنين لن ينجوان في الجرد البعلبكي القارص والحيوانات البرية المتوحشة المعروفة ب بسينات الحارة، الموجودة في جنينة ابي. انا اكتب من الڤان الآن وهو عم يعبي ركاب من حد المسابكي (مطرح ما كان يلفي دريد لحام اتمنى لحقو قبل ما يموت هو وديفيد غيلمور من فرقة بينك فلويد الشهيرة)

البعض منكن خلال القراءة يتساءلون لماذا فيكيش تسافري من البلد، والسبب هو انا ما فيني روح كرمال الوالد، والوالد ما في يروح كرمال ناني. وهلق انا صار عندي ولاد ناني ضل كرمالن، شبع فيهن ما تبقى عندي من امومة تجاه اولادي الوهميين اللذين، شكرا الي، لن يضطروا انن يتعلقوا بريحة الضراط كرمال يعيشوا.

Tags: Cats, Beirut, Relationship with father, immigration, cat rescue, poverty